用咗人工窗邊光去營造清新感覺嘅【西餐類食物相片拍攝】三個迷你漢堡飽主題

不厭其煩地講，我哋嘅拍攝手法，基本上係絕大部份都利用人工打燈方式去做。

咁係因為香港嘅餐廳環境，唔係間間都有露台、窗口等位置，由根本上已經好難用得到天然嘅窗邊光，而如果想要得到清新風格，好似好新鮮咁樣嘅感覺的話，由後方或者斜後方進入嘅所謂「窗邊光」係必需要嘅元素之一。

所以，咁嘅情況唯有用人工方式去打燈，解決問題；然後只要響斜前方再補上人工光源，令食物更加有立體感，成件事就搞掂晒。

因為漢堡包屬於比較立體嘅食物主題，如果單純只有後邊打過嚟嘅光源，漢堡包嘅正前方會漆黑一片，尤其是漢堡扒屬於比較深色嘅食材，往往同漢堡包本身嘅色澤差距非常之大，補光嘅重要性就會更加明顯。你唔由前方補光的話，呢個結果將會係黑炭包。

一般嚟講，漢堡包中間嘅配料都好容易會被遮蓋，唔容易睇到，但往往裏面嘅配料先至係主角，例如安格斯牛肉呀、黑毛豬漢堡扒呀等等，唔突出主角，點樣可以引發客人食慾呢係咪？

好喇，咁又應該點處理呢？其實好簡單，就好似今次嘅情況，我哋就選擇咗將頂層嘅包向後面打開，並且固定住，做到好似扇貝咁打開咗，等裏面嘅配料可以受光，自然就能夠突出返主體食材啦。

有需要的話，大家都可以照以上嘅資訊去處理同自家拍攝。而如果你都需要影相似嘅食材，又擔心自己無信心去影到的話，可以試吓搵我哋幫手呀。