今次試吓講配角嘅重要性。本身呢幅相，主角自然係牛扒同炸薯角
但係因為客戶嘅要求，佢希望張相表現出嘅感覺係畫面豐富啲，同有少少高級感覺；但同時又因為餐廳本身採用嘅碟係呢種西餐白色碟嘅關係，感覺色彩唔算好豐富…
響呢啲時候又可以點做呢？
咁其實好簡單嘅啫，都係用構圖堆疊方式去做就可以解決。就好似今次呢張相咁，如果背後係全部純白色嘅背景，無特別去使用配角，當然可以走清新路線，突出主題；但既然客戶有指定要求，自然要跟住指示去做嘢。
我自己最常用嘅手法，就係立即走入去個客嘅廚房或者水吧，睇吓有冇就手嘅器具同新鮮食物材料，即係今次所指嘅「配角」可以用。
今次嘅情況，配角我就搵咗兩隻紅酒杯，將佢直同打橫擺放，帶來畫面變化，然後配埋紅酒樽少少入鏡，去配合西餐嘅感覺；另一頭就放新鮮又紅紅綠綠嘅蔬菜，增加顏色對比。
然後背景特登利用餐廳本身嘅牆壁，做黑白嘅對比，同時突出經過打燈之後有反光影射入去嘅紅酒杯，進一步豐富畫面嘅光影，最終就可以令到畫面擺脫單調，同時具備色彩同光影層次。
呢一張相我用咗四支閃光燈去拍攝，出來嘅相片算係比較明亮，但如果我自己睇的話，係質感唔強烈，同埋並唔係太型格。
拍攝同打燈嘅方式可以有無限咁多嘅調節
視乎情況，其實呢種拍攝同打燈嘅方式可以有無限咁多嘅調節，例如減少一支閃光燈，盡量將閃光燈由左邊斜後方同左邊前方打入去，透過放棄右邊嘅閃光燈，製造更加強烈嘅立體感，甚至乎連後面牆身上面嘅嗰一支閃燈都減去，令畫面偏暗。
咁樣的話，自然可以更強烈咁去突顯食材同佢本身嘅立體質感，不過呢種情況好選擇客人，唔係個個客戶都喜歡，一定需要事前充分溝通好再去拍攝，先至可以令客人得到喜歡同滿足嘅成品。