一般嚟講呢，影食物相的而且確係屬於靜態拍攝嘅範疇，尤其是係做餐牌嘅食物相，就更加應該放喺度清清楚楚咁影食物，去俾個客人知道佢即將要點嘅餐究竟係有啲乜嘢內容。
不過呢，由營銷嘅角度嚟睇，就唔應該咁一刀切，所有嘢都係靜態咁去影，咁樣做真係太過悶啊。
所以我哋嘅拍攝，好多時除咗主力去靜態咁影食物本身嘅相片之外，都會搵一啲比較主打嘅食物，用唔同嘅手法去營造一啲動態，令到個畫面冇咁悶，同時可以突出食物嘅質感同強調主角。
又或者咁樣講，將食物好似實際放入口嘅動態拍出嚟，會有更強嘅引發食慾效果；同時放近少少畫面，透過背景輕微嘅模糊，就可以更加有效咁突出主角，去強調食材本身嘅質感。
咁樣嘅手法可以有好多種唔同嘅實際處理方式，例如用筷子夾烏冬或者麵類等等都可以。
而今次嘅主題係香草燒牛肉，剛剛好牛肉嘅橫切面都係需要強調嘅地方
只要用隻叉輕輕拎起去拍攝，就可以同時表現出香草配料同肉質本身嘅美好。
用呢一種手法影出嚟嘅相片，好適合用響海報入邊，配合少量嘅設計元素，已經非常之突出；或者作為餐牌全頁或者半頁嘅主題相片、標題相片都非常合適，可以一氣將成本餐牌嘅格調拉高。