記得我響之前嘅另一篇文章曾經講過，漢堡飽嘅處理方式，包括可以將佢打開，露出裏面嘅配料咁樣去影。
果種係影漢堡飽嘅其中一種手法，但唔係唯一一種
王道嘅拍攝手法，就係你成日喺麥當勞同其他主流漢堡包連鎖店都會都見到嘅水平攝影角度
完全水平角度，算係影漢堡包嘅其中一種必然處理方式。
如果由設計角度去睇的話咁樣影相其實係幾方便，因為就算你搵唔同嘅攝影師去影，事後影出嚟嘅相，角度都會頗為統一，響後期再搵設計師去設計餐牌或者海報嘅時候，設計上嘅難度會低好多，亦都容易去編排同透過設計方式製造唔同嘅變化，美觀程度高。
不過實際操作時，就要花多啲時間去響食物造型上面，先至可以做到更優質嘅成品。
如果用我今次呢張相去評價的話，其實我呢張相算係反面教材
用商業食物攝影水平去睇的話，有幾個位一定需要執正佢先至得，首先係塊漢堡扒，右邊見唔見到佢無咗阻一忽﹖實際上應該要要求廚師搵一塊同漢堡包直徑一樣，甚至乎大小小嘅漢堡扒，睇起嚟先至可以更美觀。
第二，係麵包嘅本身，有太多嘅缺陷位置，同埋麵包冷卻或者受壓力之後出嚟嘅摺痕。
當然呢啲可以的話梗係事先處理好先至拎嚟影相，或者係準備定幾個同樣款式嘅包，去慢慢揀選最適合、品相正嘅去影。不過，如果實際情況唔許可，例如拍攝資源唔足夠的話，就可以選擇後期用Photoshop或者AI去做後期，逐張逐張修正。
而另一個就係配料嘅青瓜同洋蔥，呢啲都係響攝影嘅時候可以稍為用少少手法，去令件事更好睇嘅地方。例如青瓜片可以切厚啲，洋蔥亦都可以切咗做洋蔥圈，盡量闊身少少，並排響漢堡扒上面，咁出嚟嘅質感就會完全唔同晒。
響商業食物拍攝嘅範疇，相片成品出嚟好定唔好，有好多時都係取決於造型上邊嘅仔細程度
如果可以事先預備得更充足，就算打燈方面弱一啲都好，通常出嚟嘅製成品唔會差得去邊，總有得救嘅。