關於實際影相前準備功夫，好多客人都會問，所以以下整理咗一部分比較主要嘅地方，畀大家參考一下。

因為我哋嘅客人主要都係餐廳客戶，影相嘅場地主要都係喺餐廳裏面，所以今次都係呢個方向為主。

餐廳影相前應該注意事項︰

1.預留影相用嘅位置攝影師

通常影食物相都係要【單頭】為主，即係每道餸菜獨立去影，除非係特別需要影套餐或者大合照，如果唔係，獨立一道道餸菜嘅拍攝，實際需要嘅地方大約係一張四人枱 + 枱週邊嘅地方就足夠。

點解需要預留週邊嘅地方呢? 因為拍攝嘅時候通常都需要打燈，攝影師需要視乎實際情況擺放燈架同閃光燈。

另外要留意，影相嘅位置盡量避開太暗嘅地方，攝影師會好難對到焦，影響拍攝進度；亦都唔應該預留窗邊嘅地方，因為窗外嘅陽光有變化，會影響打燈嘅效果，影響成輯相嘅統一感。

2.預備合適嘅餐具

有合適嘅餐具係好重要嘅。所謂巧婦難為無米炊，如果冇合適嘅餐具，就算攝影師識飛都冇用，好難影出足夠好嘅效果。至於點樣預備合適嘅餐具，可以參考以下呢篇文章。

3.準備少量擺設同道具

雖然我哋嘅攝影師除咗相機同打燈用嘅閃光燈之外，日常都會帶備竹蓆之類，影相嘅時候鋪好枱，稍作擺設。但係攝影師一個人冇辦法拎到太多嘢，如果餐廳方面能夠預備更多配合餐廳風格嘅小擺設或者道具，可以畀到攝影師更多嘅變化同空間發揮，影相出嚟嘅效果會更加好。

4.同師傅夾好攝影內容

影食物相，其中一個靈魂所在，就係餐廳嘅師傅。攝影師想要影到啲相美輪美奐，都係要靠大師傅嘅功力幫手。所以餐廳客戶方面，響正式開始影相之前，一定要同大廚夾好內容、數量，甚至係咩時間影，例如需唔需要響落場時間先影等等嘅細節。

另外，影相用嘅食物始終同實際出餐嘅有一啲分別，主要都係擺設同外形上嘅問題。有時唔係師傅煮得唔好，而係師傅煮嘅嘢比較偏向於實際好唔好味，並無特別考慮拍攝效果，最後令到影出嚟嘅食物相冇辦法達到要求。

關於影食物相嘅細節，各位可以參考呢一個分類入面嘅文章，我哋會不斷更新唔同嘅內容，傳授關於拍攝細節上面嘅資訊畀大家。