老老實實，自從數碼相機出現之後，影相確實係變得容易咗好多(甚至依家已經去到唔駛用腦，叫AI搞就得)，但其實要影出專業級數嘅食物相，講緊係唔用AI整到穿崩，或者俾你盡力拉大去用都唔會出事、用晌印刷都夠做，印出街都OK嘅，真係冇咁簡單。
特別係食物攝影，要影得好其實仲需要掌握一啲基本技巧同埋竅門。下面會介紹3個基本到最基本，去提升你攝影基礎技術嘅方法(或者叫方向性??)。
方法1：試吓用數碼相機嘅手動模式（M Mode）
數碼相機固然方便，但其實學攝影嘅基本，用傳統嘅菲林相機可能會更有效。不過，如果冇菲林相機(其實通常都唔會有)，就可以試吓用數碼相機嘅手動模式（M Mode）
若然你係真心想影好食物相(或者嘗試進入專業範疇)咁樣的話，脫離P Mode，甚至半自動模式都唔用，係絕對需要嘅第一步。你需要先了解光圈、快門速度同ISO之間嘅關係，唔靠自動模式，親自調校設置，掌握攝影嘅基本。
講返我嘅親身經驗，其實喺M Mode底下，固定光圈、快門速度同ISO其中一個，再逐步微調，慢慢就可以拍到更好嘅效果。新手攝影人的話，建議你選擇外觀比較穩定嘅食物，例如炒飯或者天婦羅，可以非常擺得，你就會有足夠時間去調整設置，嘗試影得更好。
方法2：慢慢觀察你要影嘅食物
熟練嘅老手的話，我哋通常攞起相機就即刻開始影架喇。但，你其實可以試吓停一停，慢慢觀察周圍環境，仔細咁睇下你想影嘅嘢先。諗下邊個角度可以令食物睇落去更吸引，光線打落去嘅效果點樣等等。舉個例，如果想強調壽司，用大光圈將背景虛化，可以令壽司更突出。
但如果係影餐牌上面嘅飲品集合照，全景清楚反而可以傳達更多信息。
另外，一般影食物比較多用45度角，因為較為接近平常眼見食物時嘅角度，會特別少違和感；但其實有個別食物，例如漢堡包等等，拍攝角度一定要有咁低得咁低，近水平角度咁先影得靚。唔信你自己去麥記睇吓??當你去觀察其他專業人士影出來嘅相，慢慢你都會能夠培養出屬於自己嘅攝影眼。
方法3：限制自己用嘅器材
唔需要最新款嘅數碼相機或者昂貴鏡頭，都可以拍到靚相。基本嘅器材已經足夠。試吓用單焦距鏡頭（例如35mm或者50mm）嚟影相。咁樣迫使你需要走近主體去拍，有助培養你嘅觀察力，搵到最佳嘅拍攝距離。
影相其實係用腦諗、用眼睇、用心感受嘅過程。唔靠昂貴嘅器材，反而用自己嘅感覺去拍，先至可以拍出有靈魂嘅相片。
當然，如果你嘅觀察力提升咗，可以開始學習光線運用。如果你想成為專業嘅食物攝影師，控制光線都係好重要嘅技術。
最後
成為專業攝影師冇捷徑，一定要花時間學習基本功。唔好太過依賴器材，而係要磨練自己嘅技術。同樣，食物攝影亦然。掌握基本，發揮你嘅創意，拍出屬於你嘅靚相！
希望呢啲小技巧幫到你提高食物攝影嘅水平。快啲攞起相機試吓啦！