另一個好多時候客人打嚟會問嘅問題就係︰「有乜嘢餐牌類型可以揀?」
因為唔係每個客人都經驗豐富，有好多都係新開張、第一次頂手等等嘅人。
咁，好老實，有邊個會唔知道【餐牌】係乜嘢呢係咪? 但其實就算你成日見到，唔代表你會留意佢有幾多個種類、做法、詳細規格等等。
到你實際要做嘅時候，你就會發現其實有好多嘢你係需要知道的。
講返轉頭，關於餐牌類型，基本上分為以下幾類︰
卡紙 + 過膠
最簡單嘅係一張A4尺寸卡紙，雙面過膠印刷品，呢種雖然唔襟用，好容易濕水就爛，但因為平同方便，非常適合經常需要轉變嘅午餐、下午茶餐、其他優惠等等。可以放嘅情報同資訊量唔多，不過一般茶餐廳嘅餐牌都足夠。因為用得兩三個月頭就已經殘舊，其實係好適合剛開張嘅新餐廳，因為好多時佢哋響開始計兩三個月左右，透過觀察日常客人嘅喜好、可以接受嘅價格同食物等等，需要更改或者微調、加減餐牌內容。
PVC餐牌
呢一類型嘅餐牌質地係PVC膠，因為係用熱壓夾住印刷內容，完全防水，價錢適中，好適合餐廳使用。尺寸只可以係A3、A4、A5呢三種固定尺寸。同埋要留意，因為比較挺身同有彈性，可以少量屈曲，但就唔可以對摺。因為佢本身有一定嘅硬度，好適合配合座枱夾，直立式咁放響餐枱上展示。
騎馬釘餐牌
如果未試過印刷書刊的話，可能會對【騎馬釘】呢樣嘢比較陌生。但其實佢喺我哋嘅生活當中係經常出現的。所謂【騎馬釘】嘅書刊，即係喺個書脊位嗰度有一條摺痕，然後用兩口釘書釘裝好嘅印刷品，圖書雜誌都好常使用嘅釘裝方式。如果用晌餐牌的話，客戶需要比較多嘅頁數去展示餐牌內容，例如要八面(8PP)、十二面(12PP)、十六面(16PP)或者更多嘅時候，就應該考慮選擇。價錢適中，同卡紙 + 過膠一樣質地，唔襟用，好容易濕水就爛，但因為平同方便，非常適合中至低價位目標客戶為主嘅餐廳用。
精裝皮殼餐牌
適合中上價位餐廳、日本料理、中菜館等等使用嘅餐牌類型，簡單講係精美、感覺比較高級，但係人工手做嘅關係，製作單價比較貴。皮殼本身一定程度防水，皮面顏色、紋理可以自選，封面可以做餐廳名嘅壓凹、燙金等加工，內頁可以更換，增加方便程度…晌工藝上面有唔少可以調節同度身訂造嘅位，可以完全自訂屬於同適合你餐廳格調嘅製成品，係適合高級餐廳比較長遠使用嘅類型。
咁如果我只係做外賣呢? 可以點做?
呢層就簡單啦。一樣照正常做設計，然後唔係印普通餐牌，而係當成傳單一樣咁去印外賣紙就可以。印一定數量任客人自取即可。而如果你舖頭係可以俾客人填紙仔點選外賣的話，就可以設計時預設一啲格仔位置，然後選擇用可以書寫嘅紙質去印刷，就能夠方便客人填寫。你同我地講話要做【點餐紙】的話，我地就明白你呢個需求架喇。