既然花得功夫、花得成本同時間去影一輯靚相的話，自然想個製成品有咁靚得咁靚。但其實想要影得好，除咗攝影師嘅技術之外，餐廳方面嘅配合同準備功夫都好重要。

正所謂巧婦難為無米炊，如果餐廳方面乜嘢準備都冇，老老實實，攝影師識飛都冇用。

咁究竟想要影一輯好嘅食物相，作為客人一方晌餐具上究竟有乜嘢可以預先準備，今次就稍為探討一下。

首先係餐具。通常餐廳拍攝的話，都會直接使用餐廳原本就有嘅餐具碗碟去影相，一來比較接近實際成品同分量，廚師預備同製作都比較方便；二來無需額外付出成本，無論係添置特別餐具嘅時間，或者購買餐具上面嘅錢，都係一種成本，如冇特別必要，可免則免。

但係，問題來了。

餐廳日常用開嘅餐具，唔一定適合影相用。

有幾個常見嘅問題，大家可以預先留意一下。

1.忌崩口碗

日常餐廳使用嘅餐具，往往歷經日上無數劫難，碗邊崩口情況相當常見。平常唔會特別留意到，往往係影完相之後先覺得礙眼，咁就出事啦。所以，如果決定使用餐廳嘅餐具，一定要事先揀選比較新淨，冇崩口嘅。

2.顏色同設計唔夾

如果餐廳方面本身就打算將拍攝嘅相片用於設計，好有機會需要配合設計方向去準備。舉例個設計本身係屬於色彩繽紛嘅，但係餐廳本身所使用嘅碗碟係黑沉沉或者顏色樸素一啲，甚至乎係外賣為主，如果冇特別留意就直接使用，咁就好有機會影完出嚟先至發現出問題。

3.餐具大小同深淺問題

呢一個問題好多客人係完全冇預過會發生，通常係實際拍攝時攝影師提醒先知道。有啲餐廳，尤其是係西餐廳，平常使用較大嘅碗碟，本身冇乜嘢，但係如果用番呢啲碗碟去拍攝，就會出現比例嘅問題，因為如果張相嘅碗碟邊緣太大，實際出現響設計度嘅時候，比例上就會令到食物顯得細小，冇辦法突出食品本身嘅魅力。呢種問題好多時都會出現起例如意粉同牛扒類食物所用嘅餐具度，客人有需要留意一下。

另一樣經常出事嘅餐具，就係日本拉麵用嘅碗。如果所用嘅碗太深，令到碗邊比例太高，同樣會響比例上令到拉麵好似好細碗，甚至比人感覺係好似食到一半咁樣，完全唔美觀。而且隻碗太深會引發另一種問題，就係會令到拍攝時候打燈角度受阻，只能夠由較高角度打燈，避免陰影覆蓋半邊食物，造成陰陽面，影響拍攝效果。

4.餐具表面光滑或使用不銹鋼餐具

就正如剛剛第三點所講，拍攝時候係會打燈的，如果餐廳所使用嘅餐具係不銹鋼質地，或者其他光滑而且容易反光嘅表面，都一樣會令打燈難度提高。呢個問題雖然唔係冇得解決，但係往往會影響拍攝進度，響香港樣樣都需要高速進行嘅情況底下，本來兩個鐘頭就可以影完嘅相，隨時變成四個鐘頭先搞得掂，畀你都唔希望啦係咪?

總結一下

講完以上4個常見嘅使用餐廳本身餐具去拍攝時常見嘅問題，依家就來總結一下，如果我係客人，我究竟應該點樣選擇好。

簡單啲咁講，就係要

【統一色調、配合設計主題、新淨冇穿冇爛、食物嘅比例大小配合、啞面唔反光】

如果你嘅餐廳所用嘅餐具能夠滿足以上要求，咁拍攝上應該會少一個問題發生。