壽司，係日本料理嘅經典代表，仲係唔少人都會成日享受嘅美食
所以相對攝影需要都比較大，餐廳搵我影相嘅次數絕對係算多。
而隨住科技越黎越發達，依家甚至開始可以連影相都費事，好多人會直接用AI生成相片去用，老老實實，係會受到一定嘅影響嘅(正走向失業大軍攝影師+1)。
咁，為咗保住生計，真係有需要認真面對現實，仔細睇下究竟我拎自己影嘅壽司相，同用AI生成嘅壽司相，其實會有啲咩分別呢？一齊嚟探討下！
以下先放兩張相，比大家比較一下︰
我唔開估的話，大家會認為邊一張先係AI??
答案係四件壽司呢張。
嗯…先要講一聲，嚟到2025年頭(寫呢篇文嘅時候)，AI生成嘅相確實係已經去到一個「可用」嘅程度，而且非常方便，幾秒就搞掂(4張，唔同款，每次!!)，撳個掣OK。如果用晌餐牌入面，只要張圖係細的話，唔會起格，唔容易穿崩，係的確夠用的(好，準備失業!!)
咁當然，如果仔細再考慮落去，AI生成相片嘅時候，依然有好幾個問題係無辦法解決到嘅︰
最首先，係統一感
用AI生成的話，雖然你仍然可以用指令去「限定」某一個程度既內容，但始終無法子100%控制生成結果，(目前計)做唔到完全一樣嘅光源、角度、仔細位置、配料等等。只係用於單一相片設計的話，問題係唔存在嘅；但往往用晌餐牌設計的話，一堆相張張都唔同風格，好容易就會無咗統一感，成品感覺會差咗。
用返我自己嘅相片為例，係可以做到「一個系列」統一感覺，無違和感。呢個位的確係會有分別。
第二，係真確性+不確定性。
當社會上有相關法律管制，例如香港有「商品說明條例」時，你選擇用AI生成圖片去展示食品的話，係無法確定自己唔會有一日俾人客挑戰，唔小心犯咗法之類；同時因為AI有生成上嘅不確定性，例如你控制唔到生成出來嘅食物份量、件數、配料多少等等，到出餐時同AI相唔同，又係會出事嘅節奏喇…
第三，始終都係美感問題。
確實，AI食物相係靚嘅，有種幾近完美、好似幅畫一樣嘅完成度。但係問題在於表現食物本身嘅時候，仍然缺乏可以仔細控制美感表現嘅能力。舉返相同相片為例，如果我嘅客人，或者佢嘅壽司師父認為吞拿魚壽司一定要切成圖中形狀先係靚，咁無論我GEN幾多次AI，我都無辦法做到要求(我自己用唔同prompt試左10次，生成40張相，都係唔得)
當你，或者你嘅客人有高度而且仔細嘅要求時，AI確定不可用。
第四，好喇，我終於開始嘗試仔品評自己影嘅壽司相 VS 用AI生成壽司相，究竟有乜分別︰
1.肉紋︰AI始終係有缺憾位，部分相會發現側面同表面肉紋、脂肪紋路對唔上，會穿崩；相反相機可以捕捉到壽司嘅微小細節，例如魚肉嘅紋理、米飯嘅顆粒感等。
2.光影︰AI係模仿得好好，有時比起自己影更好添。雖然佢做唔到指定位置單光源營造氣氛
3.飯粒︰其實我都係對比咗幾張相之後，先拎依家呢張AI相出來比較，因為佢壽司飯粒係最好，無出事。但有時會出現奇怪例子，例如米粒無啦啦分成兩三舊等等。
其他…無特別太大分別。
結論︰如果你無特別要求，其實係可以用AI生成壽司相
不過，若果你係有要求、希望做好個餐牌的話，真心，目前計AI相仲未可以幫到你住，最多只係可以用於輔助成分(希望我唔會因為咁而失業啦…)