【警世】千祈唔好以為影嘢食一定要搽油【生肉類拍攝作品】霜降和牛的相片

上次響另一篇生肉類文章嗰度曾經講過點樣打燈影肉，曾經提過仲有另外兩個重要因素…

無錯，其中一個常見嘅影嘢食手法就係搽油

但個問題唔係教你點樣搽油先至影得好，調返轉頭，其實我係想話你知，其實根本就冇呢個需要。如果響打咗燈嘅情況之下，其實呢係基本上唔需要搽油。

因為你咁樣做會搞到肉嘅紋理唔見曬!!

響有打燈嘅情況之下，搽油上去會令到啲油反光，形成高光甚至乎爆光嘅位；油嘅反光能力非常高，唔小心處理基本上冇人睇到你影嘅嗰塊肉係點嘅樣，佢只會見到白色一塊…。

所以唔強烈唔建議搽油 (雖然經常都有客人問使唔使…)

喺呢件事上面我明白嘅，好多時因為影相嘅時候有機會食物比較早就做好放響度，本身排緊隊影，響室溫放室內有時會偏乾身，客人會怕影出嚟嘅效果唔好。

如果遇到極端嘅情況，食物本身已經放到好似肉乾咁嘅樣，基本上我會叫佢…

【不如重新做過一份啦??】或者叫師傅稍為抖一抖唔好咁急拎啲食物出嚟擺。當然啦，如果情況唔許可，其實搽油唔係唔得，但係搽完之後一定要充分抹乾淨，唔可以留個水氹響度，咁樣一定會出事…

好啦今次講到呢度，下次再講埋另外一個影生肉類相片嘅重要因素。

有興趣嘅朋友，可以睇下我哋其他嘅生肉類相片