教你點樣影靚塊肉!!【生肉類拍攝作品】日式燒肉用特上牛胸腹的相片

日式燒肉大家都鍾意食，所以攝影需求通常都係唔低。

但係攝影技巧嘅需求就相當高!!因為要影到生肉有新鮮嘅感覺，絕對唔係手機或者普通自行影相做得到嘅效果。呢個根據我影食物多年經驗，見盡無數客人自己影相出嚟嘅相，嗰種將啲貴價日本和牛影到黑蚊蚊、啲顏色好似畀人打咗一身咁瘀曬，完全可以稱之為浪費嘅情況，係非常之常有…。

好啦以今次呢張特上牛胸腹相做例子，講下究竟點樣處理生肉嘅相片

首先影得生肉，感覺一定係需要新鮮；而張相需要有新鮮嘅感覺，一定要打燈影，而且要計算好入光角度先得，一般情況之下太陽光做唔到嗰種效果，更加唔好講響室內黑蚊蚊嘅地方去做啦。

頭先咪話要計好入光角度嘅??究竟點樣嘅光先至可以??

係半逆光，即係由食物嘅斜後方打過嚟嘅光。

舉個例如果將物本身當係中心點，攝影師響六點鐘方向，咁啲光嚟嘅位置大概係兩點或者十點鐘方向，就可以稱之為半逆光，或者叫做窗邊光。

打咗呢種燈，就可以有張相裏面嗰種新鮮同光鮮嘅感覺，絕對係對生肉類嘅相片，極之重要嘅打燈基礎方式。

完成咗關鍵嘅光之後，只要喺前面加少少反光，將啲肉嘅紋理顯示返出嚟，基本上就搞掂。

不過當然唔會淨係咁樣咁簡單，仲有兩個重要因素需要注意…

關於呢兩個重要因素，等我賣個關子，留起之後嘅其他生肉系相片系列裏面再講。

可以在此參看一些同樣是生肉類相片