有好多客戶打電話嚟問嘅時候，其中一項最首先想知道嘅，就係成個製作流程

所以為咗各位潛在客戶，今次特別整理咗相關嘅資訊，希望可以方便大家。

首先，最重要係報價

打得嚟問嘅客戶，都係有實際需求，我哋第一部係要搞清楚客戶需要嘅餐牌類型、設計數量、印刷數量、係咪需要影相同翻譯等等，有齊曬呢啲資訊，我哋先至可以正確咁報價畀客人，正式進入下一步。

當客人對個報價冇問題，下一步就係正式預備餐牌內容

響呢度我當個客人係做曬全套餐牌連食物攝影、翻譯同設計咁去處理，咁首先最重要係預備好餐牌用嘅文字內容。

為咗方便餐牌嘅製作同加快速度完成，強烈建議客戶預先整理好餐牌嘅文字內容，以excel檔案排列好，就好似呢一個檔案。設計師拎住呢一個檔案，就可以好輕易咁拎到文字嘅內容出嚟用，亦都唔容易亂，減少出錯，自然可以夠快搞掂個餐牌設計。

同時間，有預備好嘅文字內容，就可以開始翻譯

為咗唔容易混亂，最好係用已經決定好嘅最終版本開始做翻譯，如果中途突然間再修改或者加減項目，翻譯嘅時候就容易出錯。

全個餐牌好多時都有100至200個菜式，翻譯通常都需要幾日嘅時間先能夠完成

一般就會響呢個時間開始影相

通常一個餐牌用得到嘅相片總數不外乎幾十張，通常預留一日半日嘅時間去拍攝就足夠。除非相片需要退地去背，即係剪走個背景使用，否則通常相片第二日左右就可以調整完成。去背嘅相片就需要視乎數量同複雜程度，額外需要一個星期至一個月不等去完成。

通常如果係需要落食物相嘅餐牌，我哋係建議先影完相，確定咗相片嘅風格，之後再做設計的

但如果客人想設計方面已經有特別要求，或者需要趕時間開張使用，亦可以預先做好設計框架，放入文字內容，最後先至放相片都得。咁樣做可以稍為節省設計嘅時間，但就需要客戶預先決定好用邊一種設計風格，事後亦都盡量唔好再更改框架內容。

到完成曬基本嘅初稿，就進入修改嘅階段

響呢個位，就好睇之前嘅預備功夫足唔足夠，如果事先已經決定好曬所有項目，冇乜特別多嘅錯誤同修改或者加減嘅地方，咁淨返低嘅就係設計上嘅微調，相對時間上唔會花費太多，加快進入最後嘅階段。

最後嘅階段係乜嘢? 咪就係印刷囉

拎去印刷嘅時候，好多嘢就係印刷公司決定，例如要幾多個工作天先可以完成、運送需要幾耐時間等等。雖然通常都有一定嘅規律，但如果係趕住開張嘅客人，我哋就強烈建議盡量預早時間進入呢個階段，減低運輸遲送貨、送錯之類問題而出事嘅機會。

當然啦，以上只係一個參考，每一位客人嘅實際需求都會有少少分別，我哋會依實際嘅環境狀況去處理，最緊要你清楚自己需要啲乜嘢餐牌，話畀我哋知，我哋會幫你搵出最專業而快捷嘅方法，搞掂件事佢。