食物攝影當中，飲品嘅拍攝算係比較高難度嘅一種
想要影得好好有好多嘅準備功夫需要做，而且視乎設計嘅需求，事前唔諗清楚咁去拍攝的話，最終出事嘅機會率相當之高。
舉一個簡單嘅例子，你想影一杯睇起嚟清涼透心而且晶瑩剔透嘅凍檸茶，如果就咁拎起部相機，響是但一間茶餐廳裏面，唔理會背景、燈光同埋你所用嘅杯，甚至您所使用嘅冰同檸檬，呢一啲條件，你認為能夠成功影到見得人嘅凍檸茶機會率有幾高?
我諗六合彩二獎咁上下啦。
咁好啦，既然要影好飲品咁難，作為客人方面究竟有乜嘢可以做呀?
首先你一定要決定一樣嘢，就係你張相打算點樣用。
究竟你想杯飲品有背景配套? 定係打算退地出嚟放入其他設計入面用?
因為兩者之間嘅拍攝手法會有好大嘅分別，事前唔決定好的話，最後任由攝影師發板，出咗咩事你唔好抱怨呀。
好啦，咁實際講下應該點樣準備先。
如果係實際有背景配套嘅飲品相，其實就同普通其他食物相分別唔係太大，一樣都係咁樣影，一樣咁樣去擺設定打燈。不過就要小心，如果你用嘅係比較高身嘅杯，因為比例嘅問題，會係影直度嘅相比較好睇，影橫度的話就有機會裁走一部分杯身，或者令杯飲品喺張相入面嘅比例太細，唔夠突出主體。
如果要配合設計的話，就要考慮一下可唔可以用到直度相片。
唔得的話，可以考慮預備一啲同飲品本身相關嘅擺設，充實返個空間，營造更好嘅構圖，都係常用嘅手法。
而如果係打算退地放入其他設計，咁需要預備嘅嘢就多少少。
例如，用玻璃杯影嘅凍飲，你想影得晶瑩剔透，一定需要預備全白嘅背景紙。因為玻璃杯會透底，背景有其他雜物的話，會全部影射入去張相裏面，影嘅時候可能唔覺得有問題，到退完地放入設計嘅時候，你就會發現有問題。
另一方面係打燈。為咗令杯飲品有更晶瑩剔透嘅效果，拍攝時嘅場地必須要預留有足夠嘅空間，俾攝影師由杯飲品嘅後方，向住攝影師方向打燈。
點解係由後方打燈呢?
因為只有由呢個角度打燈，畀燈光穿透玻璃杯身，先至可以做到所謂「窗邊光」嘅效果，令到杯飲品畀人感覺光鮮同新鮮、晶瑩剔透。
另外，影凍飲嘅時候預備嘅冰，有啲人會選擇用亞加力膠做嘅仿真冰，但係用呢啲仿真冰有個問題，就係佢哋質量畀水大，一般嘅飲品例如檸檬茶、檸檬水，如果你用仿真冰的話，一放落去就會立即沉落底，做唔到正常飲品冰會浮上面嘅效果。
所以預備冰粒都係想影好凍飲相片必需嘅其中一項。
就係好多客人都曾經問過嘅一條問題︰影飲品嘅時候使唔使放飲筒?
好老實，我係完全唔建議用嘅。因為同仿真冰嘅情況相反，膠飲筒好多時一放落去就會浮起，影落其實唔美觀；如果你做退地相，啲相係落飲筒去影的話，到退完地之後你會發現張張相嘅飲筒都唔同角度，睇落去好亂，完全冇統一感，咁樣係好影響個構圖的。
試過有客人係用紙飲筒，堅持要落埋飲筒去影，除咗浮起之外，因為影相時間比較長，事後發現紙飲筒因浸水時間太長，有發脹嘅問題，最後影都係要重新影過。
所以要影好飲品，其實係有好多細節需要留意，最好有好多嘅預備同時間，先至可以出到理想嘅效果。